ليش دايماً تتحلطم؟ ليش تتذمر من الوضع السابق والحالي؟ ليش خايف من المستقبل؟ ليش مو عاجبك شي؟ ليش ما تحمد ربك على النعمة اللي إنت فيها؟ ليش ما تقول الله لا يغير علينا؟ ليش دايماً تنتقد الحكومة؟
تعال ناخذ جولة سريعة على وزارات الحكومة، نشوف الواقع اللي قاعد يواجهه المواطن كل يوم، وتالي نقرر ليش الكويتي مو عاجبه شي. في البداية إذا بنحچي عن وزارة الصحة ما راح نخلص؛ المستشفيات سايبة، والمواطن لما يراجع ما يحصل مكان يعالجونه فيه حتى لو كانت حالته طارئة، طبعاً ناهيك عن الأخطاء الطبية اللي يتحملها المريض، وغير المواعيد التعجيزية والصعبة، دش أي مستشفى حكومي وخذ لك جولة سريعة فيه وشوف إذا المرافق تليق بالكويت أو لا. عالعموم الكويتي يصرف المئات والألاف على المستشفيات الخاصة، لأنه وبكل بساطة ما يثق بمستشفيات الحكومة.
وزارة التربية والتعليم، وركّز ترا التربية قبل التعليم، كثير من المدرسين أخلاقهم لا تليق بمهنتهم، وطريقة تعاملهم مع الطلبة غلط، حتى طريقة التعليم غالباً تكون غلط. المدرس يسب الطالب، ويضرب الطالب، وغالباً يطلبون خدمات من الطلبة مقابل درجات، هذا غير الواجبات الكثيرة والإمتحانات الخيالية وفي النهاية كل هذا وبهذي الطريقة الطالب ما يستفيد إلا القليل. طبعاً المناهج حدّث ولا حرج. ويوم يتخرج الطالب ويدخل الجامعة ينصدم إنه ما تعلم شي من المدرسة. عالعموم الكويتي يصرف الألاف على المدارس الخاصة لأنه ما يثق بمدارس الحكومة.
نشوف وزارة الإسكان وإنجازاتها العظيمة. أكثر من ١٢٠ ألف طلب إسكاني، وبدل الإيجار ١٥٠ دينار مع العلم إن أسعار الشقق من ٤٥٠ إلى ٧٠٠ دينار شهرياً. لعلمك بس؛ أكثر من ٥٠٪ من الشعب ساكن بالإيجار، وهذي النسبة أقل من النسبة الواقعية. ترا ثلاث أرباع الديرة بر فاضي. عالعموم المواطن يتجه للطوفة لأن القضية الإسكانية ما يحلها القطاع الخاص.
أخوي عندك عدالة؟ ما تخاف على نفسك؟ طيّب هات إذنك واسمعني زين؛ أكثر من ٣٠٪ من العوايل الكويتية ما تغطي نفقاتها الشهرية، أكثر من ١٠ آلاف عايلة كويتية تاخذ إعانات من بيت الزكاة وفي ناس ما وصلهم الدور، فوق هذا كله آخر ٨ سنوات قيمة تبرعات الكويت أكثر من ١٨ مليار!
أخوي.. شوف الإعلان هذا وقول لي: هل أنت في بلد عادل؟
والمصايب هذي ممكن أعرف موقع العدالة فيها من الإعراب؟
- قتل المنيس والقطامي
- إختفاء محمد البداح
- أزمة المناخ
- تعطيل العمل بالدستور
- الغزو العراقي
- الناقلات
- محاولة إغتيال الجوعان والنيباري
- جامعة الشدادية
- استاد جابر
- مستشفى جابر
- الإيداعات المليونية والتحويلات
- أحداث ديوان الحربش
- هاليبرتون وخطة التنمية
- تهريب الديزل
- اللحوم الفاسدة
- قتل الميموني والبناي
- ضرب المواطنين بالشارع
بعد كل هذا تسأل ليش الكويتي مو عاجبه شي؟ يا أخي الكويتي زين منه يعيش. ما في خاتمة للفضفضة هذي.. بس الكويت ما ودها تتبرع للكويت؟
* شخصياً الكلام العامّي يشدني أكثر من الكلام الأكاديمي *
إبراهيم العثمان
ليست هناك تعليقات:
إرسال تعليق